Vir Gemeentes

Beplanningsgids vir Gemeentes

40 Dae van Dissipelskap

1. Inleiding

Die 40 Dae van Dissipelskap is ’n geestelike reis wat ontwerp is om individue, gesinne en gemeentes te verdiep in hulle verhouding met Jesus Christus. Die kern van hierdie reis is die daaglikse uitnodiging om nie net in Jesus te glo nie, maar om Hom werklik as dissipels te volg. Hierdie projek is nie bedoel om ’n ekstra las op gemeentes te plaas nie. Inteendeel, dit is spesifiek gestruktureer om maklik geïmplementeer te kan word, omdat alle inhoud – dagstukkies, kleingroepmateriaal, gesinsbybelstudies en selfs WhatsApp-boodskappe – reeds volledig geskryf en beskikbaar is.

Hierdie beplanningsgids is bedoel vir gemeentes wat die projek wil aanpak sonder om nuwe inhoud te ontwikkel. Die gids beskryf in eenvoudige, praktiese terme wat nodig is om die 40 Dae van Dissipelskap suksesvol aan te bied in enige gemeente. Gemeentes het die vryheid om die projek binne hulle eie konteks aan te pas. Alles wat nodig is vir die aanbieding is gratis beskikbaar op die amptelike webwerf www.40dae.co.za.

Die enigste vereiste van gemeentes is om plaaslike beplanning te doen rondom ’n paar praktiese aspekte, soos die keuse van begindatums, reëlings vir ’n afskopgeleentheid (gewoonlik ’n Broodfees), die vorming van kleingroepe en die registrasie van deelnemers. Hierdie gids verduidelik elkeen van hierdie elemente. Die projek is geskik vir gemeentes van enige grootte, en kan met of sonder uitgebreide infrastruktuur aangebied word.

2. Wat is reeds beskikbaar?

Een van die groot voordele van hierdie projek is dat alle inhoud reeds ontwikkel is. Gemeentes hoef nie materiaal self te skryf, redigeer of opstel nie. Die projekspan het met sorg en teologiese integriteit ’n volledige dissipelskapskursus saamgestel wat maklik toeganklik is via die webwerf. Hier volg ’n oorsig van wat reeds beskikbaar is vir gebruik:

2.1. Dagstukkies

Daar is 40 daaglikse oordenkings beskikbaar, elk met:

• ’n Bybelteks,

• ’n Skrifbesinning,

• Kontekstuele uitleg,

• Gebedsriglyne,

• Refleksievrae, en

• Aksie-items vir toepassing.

Hierdie dagstukkies is beskikbaar op die webwerf www.40dae.co.za. Dit kan op selfone en rekenaars gebruik word, en die dagstukkies kan ook uitgedruk word vir diegene wat dit verkies. Die inhoud is geskryf in toeganklike Afrikaans, geskik vir jong volwassenes tot ouer lidmate.

2.2. Groepsbybelstudies

Vir kleingroepe, selgroepe of enige vorm van saamlees, is daar 6 groepsbybelstudies beskikbaar. Hierdie studies is ontwerp om een keer per week gebruik te word. Elkeen sluit in:

• ’n Hoofteks,

• ’n kort inleiding,

• Besprekingsvrae,

• Gebedsriglyne, en

• Opsionele toepassingsaktiwiteite.

Die groepe kan enige formaat aanneem – van fisiese byeenkomste tot aanlyn-vergaderings. Die materiaal verg minimale voorbereiding van groepleiers.

2.3. Gesinsbybelstudies

Daar is 6 gesinsbybelstudies ontwikkel, elk vir een week van die projek. Hierdie studies is gestruktureer vir gesinne om saam te gebruik op ’n weeklikse basis. Dit bevat:

• ’n Bybelgedeelte,

• ’n kindervriendelike uitleg,

• Gespreksvrae vir kinders en volwassenes,

• ’n eenvoudige gebed, en

• ’n kreatiewe gesinsaktiwiteit.

Hierdie studies help om dissipelskap van kinders en ouers deel van die huishoudelike ritme te maak.

2.4. WhatsApp-boodskappe

Vir elkeen van die 40 dae is daar reeds kort WhatsApp-boodskappe geskryf wat gebruik kan word om:

• Die dagstukkie aan te kondig, en

• Groepsbybelstudie en gesinsbybelstudie-skakels te verskaf.

Hierdie boodskappe word daagliks gestuur word aan deelnemers.

2.5. Videosnitte

Kort videosnitte (5-10 minute elk) is beskikbaar om die daaglikse tema visueel en persoonlik toe te lig. Dit is as deel van die dagstukkie ingewerk en daar beskikbaar. 

2.6. Webwerf en Tegniese Ondersteuning

Die amptelike webwerf www.40dae.co.za bevat:

• Alle dagstukkies en hulpmiddels in digitale formaat,

• Kalenderhulpmiddels om die projek te beplan,

• E-pos ondersteuning via 40daeprojek@gmail.com

Die webwerf is mobielvriendelik en maklik om te gebruik. Geen spesiale sagteware of registrasie is nodig om toegang tot die inhoud te kry nie.

3. Wat moet die gemeentes self doen?

Die volgende vier stappe vorm die kern van wat ’n gemeente self moet doen:

3.1. Kies wanneer julle die 40 Dae wil begin

Die eerste en belangrikste besluit is wanneer julle as gemeente die projek wil aanpak. Die 40 Dae van Dissipelskap begin altyd op ’n Sondag (wat as Dag 1 tel), en dit duur regdeur tot en met Dag 40, wat gewoonlik op ’n Donderdag of Vrydag eindig (afhangend of die projek oor ‘n maand met 30 of 31 dae loop). Gemeentes kan kies om die slotvieringe (soos ’n bazaar of dankdiens) op die naweek ná Dag 40 aan te bied.

Op die webwerf www.40dae.co.za is daar ’n HTML-bladsy wat help om ’n eie projekkalender op te stel. Hierdie hulpmiddel wys presies hoe die dae uitwerk. Gemeentes word aangemoedig om tydens hulle jaarbeplanning of strategiese vergadering hierdie besluit vroegtydig te neem, sodat daar genoeg voorbereidingstyd is.

3.2. Reël die Broodfees (Afskopgeleentheid)

Die Broodfees is ’n simboliese en gemeenskaplike afskopgeleentheid wat die 40 Dae van Dissipelskap op ’n warm en uitnodigende manier begin. Dit vind plaas op die Saterdag net voor Dag 1 (dus een dag voor die eerste Sondag van die projek). Dit is nie ’n formele geleentheid nie, maar eerder ’n informele saamwees rondom brood, sop, kaas en koffie.

Die doel van die Broodfees is om die gemeente te verbind, deelnemers te verwelkom, en die fokus te plaas op Jesus as die Brood van die Lewe. Gemeentes word aangemoedig om dit aan te pas volgens hul kultuur en hulpbronne. Sommige gemeentes kies om kleingroepe reeds daar aan mekaar voor te stel of om ’n kort boodskap of gebed in te sluit. Ander gebruik die geleentheid net as ’n rustige saamkuier.

Om dit te reël, benodig julle ’n gasvryheidspan, asook ondersteuning van kombuishelpers en logistiek (stoele, tafels, sopbakkies, ensovoorts). Die bemarking van die Broodfees moet vroegtydig plaasvind sodat lidmate weet dit is die amptelike begin van die reis.

3.3. Besluit hoe julle groepe gaan funksioneer

’n Kernonderdeel van die dissipelskapsreis is deelname aan gemeenskap – of dit nou formeel of informeel is. Elke gemeente moet besluit watter soort groepe vir hulle konteks sinvol en haalbaar is. Daar is vier hoofopsies:

• Fisiese sel- of kleingroepe: bestaande groepe kan eenvoudig die weeklikse groepsmateriaal gebruik.

• Nuwe kleingroepe: indien daar nie reeds genoeg groepe bestaan nie, kan nuwe groepe gevorm word wat net vir die duur van die projek saamkom.

• Virtuele groepe: via Zoom, Google Meet of Teams, veral vir mense wat ver woon of beperk is in mobiliteit.

• WhatsApp-groepe: baie gewild en prakties; klein groepies (bv. 10–12) wat elke dag net reageer op ’n vraag of insig uit die dagstukkie. Hierdie vorm van groepe is goed geskik vir deelnemers wat beperkte tyd tot hulle beskikking het.

Die groepe (behalwe die WhatsApp-groepe) kan die bestaande kleingroepmateriaal gebruik wat op die webwerf beskikbaar is. Dit is reeds gestruktureer per week en benodig minimale voorbereiding van ’n leier.

Die belangrikste is dat elke deelnemer êrens aan ’n groep verbind is – al is dit net ’n WhatsApp-groep.

3.4. Begin met registrasie van deelnemers

Om die projek goed te administreer, is dit belangrik om deelnemers te registreer. Dit help met:

• die opstel van kommunikasielyste (WhatsApp, e-pos, ens.),

• die indeling van groepe,

• die opbou van ’n gevoel van betrokkenheid en verbintenis.

Registrasie kan op twee maniere gedoen word:

• Fisies by die kerk: met ’n eenvoudige vorm by die deur of op ’n inskrywingsblad na eredienste.

• Aanlyn: deur ’n Google Form (of soortgelyke platform), waarvan die skakel gedeel kan word via WhatsApp of e-pos.

Sodra registrasie begin het, kan deelnemers ingedeel word in groepe en ingesluit word in die daaglikse kommunikasiekanale. Dit is belangrik dat die span iemand aanwys wat hierdie inskrywings en groepindelings administreer.

4. Gebruik van die aanlyn-kalenderhulpmiddel

Op die webwerf www.40dae.co.za is daar ’n eenvoudige HTML-kalenderhulpmiddel beskikbaar waarmee gemeentes vinnig en akkuraat kan bepaal wat die presiese datums van hulle gekose 40 Dae projek is.

Hierdie hulpmiddel werk op alle slimfone en rekenaars, en is baie maklik om te gebruik. Dit neem ‘n paar oomblikke om ’n volledige tydlyn vir julle gemeente op te stel. Die tydlyn kan dan gedeel of afgedruk word vir die span en deelnemers.

5. Rolverdeling in die Gemeente

Elke gemeente kan besluit hoe hulle die 40 Dae van Dissipelskap wil aanpak. Dit kan so eenvoudig wees soos ‘n aanwysing na die 40Dae-webwerf, waar elke lidmaat sy eie pad loop, tot ‘n volledige veldtog waar die hele gemeente in groepe gedeel word en elkeen deel word van ‘n kleiner selgroep, hetsy fisies of met sosiale media, soos WhatsApp. 

Hier volg ’n voorstel van belangrike rolle en funksies wat gemeentes kan aanwys. Dit is bloot voorstelle en elke gemeente kan besluit in watter mate hulle hierdie riglyne wil volg. 

5.1. Projekkoördineerder

Die projekkoördineerder is die algemene aanspreekpunt en koördineerder van die 40 Dae van Dissipelskap in die plaaslike gemeente. Hierdie persoon sorg dat alle afdelings van die projek op koers is, en is die brug tussen die projekspan en die gemeente se leierskap. Verantwoordelikhede sluit in:

• die beplanningstydlyn opstel en moniteer;

• toesien dat kommunikasie plaasvind;

• byeenkomste fasiliteer vir die span;

• probleme en vrae aanspreek soos dit ontstaan;

• kontak hou met die breër projekspan indien nodig.

’n Persoon met sterk administratiewe en organisatoriese vermoë is ideaal vir hierdie rol.

5.2. Kommunikasieverantwoordelike

Die kommunikasiepersoon is verantwoordelik vir alle interne verspreiding van inligting aan deelnemers. Hierdie rol is noodsaaklik, aangesien die sukses van die projek afhanklik is van gereelde en duidelike kommunikasie. Verantwoordelikhede sluit in:

• opstel en bestuur van WhatsApp-gemeenskap/groepe;

• stuur van daaglikse WhatsApp-boodskappe;

• hanteer van inskrywingsvorms en data-insameling;

• indien nodig, verspreiding van e-posse of drukstukke;

• versorging van aankondigings vir eredienste of nuusbriewe.

Iemand wat gemaklik is met digitale kommunikasieplatforms en betroubaar is met opvolging, is ideaal.

5.3. Groepkoördineerder

Hierdie persoon help om deelnemers in groepe in te deel, ondersteun groepleiers en monitor die vordering van groepe. In sommige gemeentes is dit dieselfde persoon as die selgroepkoördineerder. Verantwoordelikhede sluit in:

• identifisering van bestaande groepe wat die projek kan gebruik;

• vorming van nuwe groepe waar nodig;

• aanwys van groepleiers en verskaffing van materiaal;

• oprigting van aanlyn groepe indien van toepassing (Zoom/WhatsApp);

• ondersteuning van groepleiers gedurende die 40 dae.

’n Persoon met pastorale sensitiwiteit en ’n hart vir kleingroepleierskap is ’n goeie keuse.

5.4. Gasvryheid- en Broodfeespan

Hierdie span is verantwoordelik vir die reëlings rondom die Broodfees, wat die projek afskop, en enige ander fisiese samekomste gedurende die projek. Hulle funksie is om ’n verwelkomende atmosfeer te skep en praktiese reëlings aan te spreek. Verantwoordelikhede sluit in:

• beplanning en bemarking van die Broodfees;

• reël van eetgoed (sop, brood, kaas, ensovoorts);

• opstelling van tafels en stoele;

• dekor indien van toepassing;

• verwelkoming van deelnemers by die geleentheid.

Hierdie span kan deel vorm van die gemeente se bestaande diensspan, kombuisgroep of ander logistieke helpers.

5.5. Tegniese Hulp / IT-persoon

Hierdie rol kan klein of groot wees, afhangend van julle gemeente se konteks. In kleiner gemeentes kan dit net iemand wees wat help met Google Forms of WhatsApp-opstelling. In groter gemeentes kan dit insluit:

• die skep en bestuur van die aanlyn registrasievorm;

• bystand met WhatsApp-gemeenskappe of e-poslyste;

• tegniese ondersteuning vir video’s of aanlyn byeenkomste;

• hulp aan deelnemers wat sukkel om die webwerf of dagstukkies te gebruik.

’n Tegnies vaardige persoon wat gemaklik is met basiese digitale platforms is voldoende vir hierdie rol.

5.6. Opsionele rolle

Afhangend van julle gemeente se behoefte, kan die volgende rolle ook oorweeg word:

• Jeugkoördineerder: om tieners en jong volwassenes by die projek te betrek.

• Grafiese ontwerper / bemarkingspersoon: vir plakkate, sosiale media en visuele materiaal.

• Koördineerder  vir senior lidmate: om drukstukke te versprei aan mense sonder selfone/internet.

’n Goeie span bestaan nie uit perfek gekwalifiseerde individue nie, maar uit bereidwillige mense met ’n passie om ander te help groei in dissipelskap. Gemeentes word aangemoedig om elke rol toe te wys – al is dit net aan een persoon – en dan duidelike ondersteuning en kommunikasie te verseker.

6. Slotwoord van aanmoediging

Die 40 Dae van Dissipelskap is nie bloot ’n aktiwiteit of program nie. Dit is ’n uitnodiging tot ’n dieper reis met Christus. Elke klein stap, elke boodskap, elke ontmoeting, elke groepbespreking is ’n deel van God se groter werk om harte te vorm en gemeenskappe te hernu.

Moenie wag tot alles perfek is nie. Begin eenvoudig. Gebruik wat reeds gereed is. En vertrou dat die Here self sal werk deur Sy Woord, Sy Gees en Sy mense.

“Kom hier! Kom saam met My, en Ek sal julle vissers van mense maak.” – Matteus 4:1