Tema van die week

Jesus roep ons om Hom lief te hê en Hom te volg. 

Bybelteks as verhaal

Die roeping van die eerste dissipels: Matteus 4:18-22 (ook in Markus. 1:16-20; Lukas. 5:1-11) 

Lees hierdie storie vir jou kind:

Jesus roep sy eerste dissipels 

Dit was ’n helder, sonnige dag toe Jesus langs die see begin stap het. Die water van die See van Galilea het sag teen die strand geklop, en daar was ’n ligte wind wat deur die bome gewaai het. 

Terwyl Jesus so langs die water stap, sien Hy twee broers wat besig is om te werk. Die een broer se naam was Simon. Party mense het hom ook Petrus genoem. Sy broer, Andreas, het saam met hom gewerk.

Simon en Andreas was vissers. Hulle het elke dag op die water uitgegaan om visse te vang, sodat hulle kos kon hê om te eet. Nou was hulle besig om ’n groot net in die see te gooi, met die hoop dat hulle ’n klomp visse sou vang. 

Jesus het by hulle gestop en met ’n vriendelike glimlag gesê: 

“Kom saam met My. Ek het vir julle ’n spesiale werk. Ek sal julle leer om nie net visse te vang nie, maar mense na God te lei, en om hulle te help en vir hulle van God se liefde te vertel.” 

Simon en Andreas het mekaar gekyk. Hulle harte het opgewonde gevoel. Hulle het geweet hierdie man is besonders. Sonder om lank te dink, het hulle hul nette gelos, en sommer net daar saam met Jesus begin stap. 

Jesus het verder geloop langs die see. Nie lank daarna nie sien Hy weer twee broers. Hulle name was Jakobus en Johannes. Hulle was ook vissers, en hulle het saam met hulle pa, Sebedeus, in ’n boot gesit. Hulle was besig om hul nette reg te maak, sodat hulle weer kon uitgaan om vis te vang. 

Jesus het ook vir hulle geroep. “Kom saam met My,” het Hy gesê. “Ek het vir julle ’n belangrike taak.” 

Jakobus en Johannes het opgestaan. Hulle het hul pa gegroet, hul nette gelos, en uit die boot geklim. Toe het hulle saam met Jesus gestap, net soos Simon en Andreas. En so het vier vissers hulle bote en nette gelos om dissipels van Jesus te word en ander mense van God se liefde te leer.

Praat Saam

Gesels saam as gesin:

• Hoe dink julle het Petrus en Andreas gevoel toe Jesus hulle roep? 

• Hoekom dink julle het hulle alles gelos om Hom te volg?

•  Dink jy Jesus roep ons vandag ook? Hoe kan ons Hom volg in ons huis, by die skool of by ons vriende?

Aktiwiteit/speletjie

“Volg Jesus” loop-speletjie:

Een persoon speel Jesus en stap stadig deur die huis of tuin. Die ander lede volg agter Hom aan. “Jesus” kan opdragte gee soos:

• Gee vir iemand ’n glimlag

• Help iemand optel wat geval het

• Bid vir iemand wat siek is

• Sê vir iemand: “Jesus is lief vir jou”

Praat daarna oor hoe dit voel om te volg, en hoe ons Jesus kan volg al sien ons Hom nie met ons oë nie.

Gebedstyd

Bid saam, of sê elkeen 'n sin soos:
“Here Jesus, help my om U lief te hê en U elke dag te volg.” 

Laat elke gesinslid ook iets sê waarvoor hulle vir Jesus wil dankie sê.

Lewe dit uit (weeklikse uitdaging)

Gesinsuitdaging:

Elke keer as iemand iets goeds doen hierdie week, sê julle saam:

“Ons volg vir Jesus.”

Maak dit pret – sê dit saam hardop, of sit ’n hartjie op ’n plakkaat elke keer as iemand iets doen wat Jesus sou doen.

Geestelike waarheid vir die week

Jesus kies ons. Hy nooi ons om Hom te volg. Hy is lief vir ons, en Hy wys vir ons hoe om ander lief te hê.