Dag 26: Dien mekaar met Geestelike Gawes

Oorsig

God het elke gelowige uniek gemaak en toegerus met geestelike gawes. Hierdie gawes is nie vir eie voordeel nie, maar vir die opbou van die liggaam van Christus. Wanneer ons dien uit genade, weerspieël ons iets van God se karakter aan mekaar.

Bybelteks

Ons het baie lede in een liggaam, en die lede het nie almal dieselfde funksie nie. Net so is ons, al is ons baie, in Christus een liggaam, en almal afsonderlik lede van mekaar. Ons het genadegawes wat van mekaar verskil volgens die genade wat God aan elkeen van ons gegee het. As dit die gawe van profesie is, laat ons dit gebruik in ooreenstemming met die geloof wat ons bely. – Romeine 12:4–6 (AFR83)*

Konteks

Dit was 'n tyd van groot verandering in die vroeë kerk. Paulus, die apostel aan die heidene, skryf aan die gemeente in Rome. Dit was  ’n gemeenskap van gelowiges wat bestaan het uit beide Jode en nie-Jode. Hulle moes leer om saam te leef, saam te aanbid en saam Christus te volg, ten spyte van kulturele verskille en uiteenlopende agtergronde.

In Romeine 12 begin Paulus met ’n dringende oproep: “Gee julle liggame as ’n lewende en heilige offer vir God.” Hy moedig gelowiges aan om nie aan die wêreld gelykvormig te wees nie, maar om vernuwe te word in hulle denke. En dan, baie prakties, begin hy verduidelik wat dit beteken om ’n lewende offer te wees: dit beteken om in nederigheid jou plek in die liggaam van Christus in te neem – nie meer van jouself te dink as wat jy behoort nie, maar om jouself te sien soos God jou gemaak het.

Hy gebruik die beeld van ’n liggaam: baie lede, maar een geheel. Elke deel het ’n funksie, en so het elke gelowige ’n spesifieke rol om te vervul. Hierdie Godgegewe rolle, wat ook as geestelike gawes bekend staan, is nie iets wat 'n mens verdien nie, maar wat gegee word deur God se genade. Hulle is nie vir selfverheerliking nie, maar vir diens. Gawes soos profesie, lering, bemoediging, vrygewigheid, leierskap en barmhartigheid is almal nodig, en almal waardevol.

In ’n wêreld waar status en selfbevordering dikwels die norm is, bied Paulus ’n radikaal ander perspektief: waar die gemeente van Christus funksioneer in diensbaarheid, liefde en wedersydse eer.

Kom ons dink bietjie verder saam oor hoe ons mekaar met ons geestelike gawes kan dien.

Dien mekaar met Geestelike Gawes

Elke gawe is 'n geskenk van genade

“Ons het genadegawes wat van mekaar verskil volgens die genade wat God aan elkeen van ons gegee het.” - Romeine 12:6 (AFR83)*

Laat ons bietjie stilstaan by die woord “genade” in Romeine 12:6. Hier lê ’n geheimenis wat maklik by ons kan verbygaan, omdat ons so gewoond is aan die woord “genade”. In Grieks is die woord wat Paulus gebruik “charin” – dieselfde woord wat ook gebruik word vir “vreugde” of “guns”, en waaruit die woord vir “geestelike gawes” (charismata) kom. Elke gawe is dus letterlik ’n manifestasie van God se genade in aksie. Dit beteken jou vermoë om te leer, te lei, te gee of selfs net stilweg teenwoordig te wees vir iemand in nood, is genade van God wat in jou sigbaar word. Nie net iemand se genade nie – God se genade in en deur jou.

Dink net: wanneer jy jou gawe opreg en nederig uitleef, is dit nie net diens nie, maar ’n openbaring van God se karakter aan ander. Jou bemoediging word ’n fluistering van Sy troos. Jou gee word ’n refleksie van Sy oorvloed. Jou luister word ’n getuienis van Sy teenwoordigheid.

Dis ’n geheime waarheid met groot krag: God se genade is nie net iets wat jy vir jouself ontvang het nie. Jou lewe is ’n kanaal waardeur genade sigbaar, tasbaar en lewendig word in die wêreld.

En dalk is dit juis hoekom Paulus in dieselfde hoofstuk sê: “Moet nie aan jouself dink meer as wat jy behoort nie, maar dink nugter volgens die maat van geloof wat God aan elkeen gegee het.” (Romeine. 12:3). As ons onsself sien deur die lens van genade – nie minder of meer as wat God sê nie – raak dit makliker om met vrymoedigheid, maar sonder hoogmoed, te dien. En dit bring ’n eenheid in die liggaam van Christus wat geen prestasie of status ooit kan bewerk nie.

So, jou gawe is nie nét iets wat jy doen nie. Dis ’n genade-aksie. Dis ’n Goddelike fluistering deur jou menswees.

Die liggaam van Christus het elke deel nodig

“...so is ons almal saam een liggaam in Christus en elkeen afsonderlik lede van mekaar.” – Romeine 12:5 (AFR53)*

Paulus se beeld van die liggaam is 'n kragtige uitbeelding dat elke deel 'n funksie het sonder dat enige deel oorbodig is. Jou gawe mag dalk wees om lering te gee, of te dien, of dalk te gee, of eenvoudig teenwoordig te wees en te bemoedig. Al hierdie gawes is in die liggaam nodig. Niemand het elke gawe nie, en dis presies hoekom ons mekaar nodig het. Die kerk word gesond en effektief wanneer elke gelowige sy of haar plek in liefde, met ywer, en met nederigheid volstaan.

Dien is die hart van die koninkryk

“...maar wie belangrik onder julle wil wees, moet julle dienaar wees...” – Matteus 20:26 (AFR20)*

Jesus self het die pad van diensbaarheid geloop. Sy hele lewe was een van gee, genees, bemoedig, voed en vergewe. Hy het selfs Sy dissipels se voete gewas. As ons Hom wil navolg, moet ons ook mekaar dien in liefde. Ons geestelike gawes is die werktuie van diens: deur hulle bou ons mekaar op, versterk ons geloofsgemeenskappe, en bring ons lig in 'n gebroke wêreld.

Lees hierdie gebed hardop

Hemelse Vader,

U is die Bron van elke goeie en volmaakte gawe.

U het my met liefde geskep, uniek gevorm,
en genadiglik toegerus vir U werk.

Ek aanbid U as die God wat nie net red nie,
maar ook roep en toerus.

Gee my wysheid om my plek in die liggaam te verstaan,
die moed om dit voluit te leef,
en liefde om my mede-gelowiges te bemoedig.

Gebruik my, Here, waar U my nodig het. 

Ek gee myself aan U.

In Jesus se Naam bid ek dit.

Amen.

Oordenking

Doen

• Dink na oor watter geestelike gawes jy moontlik het. Is dit om te bemoedig, te onderrig, te lei of te gee? Vra vir die Here om dit aan jou duidelik te maak.

• Doen hierdie week ten minste een liefdesdaad vir iemand in jou geloofsgemeenskap, selfs al is dit klein. Doen dit met oorgawe.

• Gesels met iemand wat jy vertrou oor hoe jy jou gawes in diens van die kerk kan gebruik.

Vers om te onthou

“Ons het genadegawes wat van mekaar verskil volgens die genade wat God aan elkeen van ons gegee het.” – Romeine 12:6 (AFR83)*

Vrae om oor te besin

• Watter gawes het God vir my gegee, en hoe gebruik ek dit tans?

• Is ek bereid om met nederigheid en vreugde ander te dien, al sien niemand dit raak nie?

Nota:

Indien jy moontlik na die hele video van die "Short" hierbo wil kyk, kan jy dit hier kry (maar let daarop dat dit 'n 14 minute video is - heelwat langer as wat ons daaglikse videos is).