Dag 11: Nederigheid met Christus as Voorbeeld

Oorsig

Om ’n ware dissipel te wees, beteken om in nederigheid te leef. Jesus, die Meester, het Homself verneder om ons te dien. Sy lewe wys vir ons dat ware grootheid nie in mag lê nie, maar in diensbaarheid.

Bybelteks

Hy het ook met beeldspraak vir hulle gesê: “Kan ’n blinde miskien ’n ander blinde lei? Sal hulle nie altwee in ’n sloot val nie? ’n Leerling is nie hoër as sy leermeester nie, maar iemand wat volleerd is, sal aan sy leermeester gelyk wees.

“Waarom sien jy die splinter raak in die oog van jou broer, maar die balk in jou eie oog merk jy nie op nie? Jy wat die balk in jou eie oog nie raaksien nie, hoe kan jy vir jou broer sê: ’Broer, laat my toe om die splinter in jou oog uit te haal’? Huigelaar! Haal eers die balk uit jou eie oog uit, dan sal jy goed kan sien om die splinter in jou broer se oog uit te haal.” – Lukas 6:39–42 (AFR83)*

Konteks

Die pad saam met Jesus het nie net die dissipels se hande besig gehou nie, maar ook hul harte. Hulle moes leer hoe om nie net te doen wat Hy sê nie, maar om soos Hy te word. Een van die lesse wat hulle die meeste gevorm het, was die les van nederigheid.

Hulle het Hom dopgehou waar Hy die laagstes onder die mense raakgesien het, hoe Hy kinders nader getrek het, hoe Hy voete gewas het. En al het hulle Hom as Rabbi erken, was dit juis Sy deernis met onbelangrike mense wat hulle nie altyd verstaan het nie. Die wêreld waarin hulle geleef het, het status en posisie hoog geag. Maar Jesus het iets heel anders geleef.

In Lukas 6 leer Jesus vir sy dissipels ’n belangrike beginsel, naamlik dat ’n Leerling nie bo sy leermeester verhewe is nie. Dis ’n eenvoudige waarheid, maar het vele gevolge. As Hy, die Leermeester, gekies het om Homself te verneder, hoe kon hulle dan 'n ander pad kies?

Hierdie lering kom op ’n plek waar Jesus besig is om Sy volgelinge te leer hoe die koninkryk van God werk. Dit is anders as die wêreld. In hierdie koninkryk is die nederiges geseënd (Matteus 5: die Bergrede). Die wat huil, die wat vervolg word, en die wat vergewe dra God se seën. En dié wat hulself verhef, sal verneder word.

Die pad van nederigheid is dus nie ’n afgradering nie maar eerder die pad van Christus self. Hy, wat God is, het Homself “leeg gemaak” (dis wat die Grieks in Filippense 2:7 sê – ekenōsen) en die gestalte van ’n dienskneg aangeneem. Hierdie voorbeeld staan sentraal tot dissipelskap. Dis juis nie om op te klim nie, maar om af te daal in diens aan ander.

Kom ons dink saam bietjie verder oor nederigheid met Christus as voorbeeld.

Nederigheid met Christus as Voorbeeld

Ware dissipels volg die voorbeeld van hul Meester

“'n Leerling is nie bo sy meester nie; maar elkeen wat volleerd is, sal soos sy meester wees.” – Lukas 6:40 (AFR53)*

Jesus stel Homself nie net as leermeester voor nie, maar as voorbeeld. Om soos Hy te wees, is die doel van dissipelskap. En Sy lewe was een van volgehoue nederigheid, van die krip tot die kruis. Wanneer ons Hom wil volg, beteken dit om dieselfde gesindheid aan te neem. Ons doel is nie om gesien te wil word nie, maar eerder om te dien.