Dag 19: Geestelike Groei

Oorsig

Geestelike groei is nie ’n toevallige proses nie, maar eerder ’n doelbewuste lewe van luister én doen. Wanneer ons God se Woord nie net hoor nie, maar toepas, word ons geloof gebou op ’n rotsvaste fondament. Groei gebeur nie in een dag nie, maar oor tyd, deur volharding, gehoorsaamheid en vertroue.

Bybelteks

“Nie elkeen wat vir My sê: ‘Here, Here,’ sal in die koninkryk van die hemel ingaan nie, maar net hy wat die wil doen van my Vader wat in die hemel is. Baie sal daardie dag vir My sê: ‘Here, Here, het ons dan nie in u Naam gepreek nie, deur u Naam bose geeste uitgedryf en deur u Naam baie wonders gedoen nie?’ Dan sal Ek openlik vir hulle sê: Ek het julle nooit geken nie. Gaan weg van My af, julle wat die wet van God oortree. – Matteus 7:21–23 (AFR83)*

Konteks

Hierdie woorde van Jesus kom aan die einde van die Bergpredikasie, wat een van die mees omvattende en radikale leringe in die Nuwe Testament is. Jesus het onder andere gepraat oor gebed, vrede, liefde vir vyande, vergifnis, en ware geregtigheid. Sy luisteraars was vasgevang in die skoonheid en die skerpheid van Sy woorde. Maar Hy eindig hierdie lering met 'n waarskuwing en 'n oproep tot aksie.

Jesus vertel die gelykenis van twee mense wat hulle huise op rots en sand gebou het. Beide ervaar dieselfde storm, maar net die huis op die rots bly staan. Wat maak die verskil? Nie wie hulle was nie, of hoeveel hulle geweet het nie, maar of hulle gehoor én gedoen het. “Wie hierdie woorde van My hoor en daarvolgens handel…” is die sleutel tot sukses.

Vir Sy eerste gehoor – Jode wat die Torah en die oorleweringe geken het – was die uitdaging nie 'n gebrek aan kennis nie, maar die toepassing daarvan. Hulle het "hoor" en "doen" verstaan, maar het soms meer gefokus op die letter van die wet, as op die uitlewing van die bedoeling daarvan, veral waar dit oor liefde vir ander mense gegaan het. Jesus het hulle gekonfronteer met die feit dat ware gehoorsaamheid 'n saak van die hart is, en nie net uiterlike nakoming nie. Om te hoor sonder om te doen, is om op sand te bou. Dit lyk goed, maar dit hou nie.

Hierdie beeld van ’n huis op ’n fondament herinner aan die praktyke van bouers in die antieke wêreld. Om op rots te bou het meer tyd en inspanning geverg, maar dit was die enigste manier om ’n huis stormbestand te maak. Jesus sê dat dissipelskap nie vinnig of maklik is nie, maar eerder ’n bouprojek van dag-tot-dag volharding is.

Geestelike groei gebeur dus wanneer ons die leringe van Christus in die praktyk toepas, in ons denke, ons verhoudings, en ons keuses. Dit is nie kennis alleen wat standvastigheid bring nie, maar toegepaste waarheid. En juis in die storms van die lewe, wys dit of ons geloof op rots of op sand gebou is.

Kom ons dink bietjie verder saam oor ons geestelike groei.

Geestelike Groei

Geestelike groei begin by gehoorsaamheid aan die Woord

“Elkeen dan wat na hierdie woorde van My luister en dit doen, hom sal Ek vergelyk met 'n verstandige man wat sy huis op die rots gebou het.” – Matteus 7:24 (AFR53)*

Daar is iets verrassend wat uit Matteus 7:24 na vore kom wanneer ons kyk na Jesus se keuse van die woord “verstandig” (in Grieks: phronimō). Hierdie woord beteken meer as net “wys” of “slim”. Dit verwys na iemand wat insig het én dit toepas – iemand wat nie net dinge verstaan nie, maar leef volgens daardie insig. In die wêreld van Jesus se tyd was 'n phronimō nie noodwendig geleerd nie, maar iemand wat prakties wys is en met oordeelkundigheid optree, veral in moeilike of onvoorspelbare tye.

Met ander woorde, Jesus sê nie net: "Wie My woorde hoor en doen, is wys in God se oë." Hy sê: "Daardie mens is voorbereid vir die lewe." Want storms gaan kom. Dis nie óf nie, maar wanneer. Ons geestelike groei en innerlike sterkte word nie gebou in die storm nie. Dit word gebou voor die storm, deur daaglikse, eenvoudige gehoorsaamheid. Die "verstandige" mens bou stadig, laag vir laag, op rots. Die geheim is om te bou op wat hou, en nie op wat maklik is nie.

Nog ’n stukkie detail is dat die woord vir “handel” of “doen” (poiei) ook beteken om iets te maak, te skep, of te bou. So, geestelike groei is nie net gehoorsaamheid nie, dis ook ’n skepping. Ons is besig om saam met God iets te vorm: ’n lewe wat Sy karakter weerspieël. Dit gee betekenis aan die klein dade van geloof. Ons bou saam met God aan iets (onsself) wat eendag standvastig staan wanneer die wind begin waai.

Geestelike groei is ’n proses van volharding

“Laat ons daarom nie moeg raak om goed te doen nie, want as ons nie verslap nie, sal ons op die regte tyd oes.” – Galasiërs 6:9 (AFR20)*

Om geestelik te groei verg tyd, geduld en volharding. Soos ’n boom wat stadig wortel skiet, verg dit herhaling en getrouheid. Daar is tye van vinnige insigte, maar meestal gebeur die groei stil-stil in daaglikse gehoorsaamheid, in klein keuses, in aanhou doen wat reg is, selfs wanneer dit nie maklik is nie.

Geestelike groei bou karakter en bring standvastigheid

“Hy is soos 'n boom wat by waterstrome geplant is, wat op die regte tyd vrugte dra en waarvan die blare nie verdroog nie. Hy is voorspoedig in alles wat hy aanpak.” – Psalm 1:3 (AFR83)*

Wanneer ons wortels diep in God se Woord en wil insink, word ons lewens standvastig. Groei bring karakter voort. In die tye van die storm of droogte sal ons nie maklik wankel nie, want ons is gevestig in Christus. Dít is die resultaat van volgehoue geestelike groei.