WEEK 3: Die Krag van die Woord – Leer en Onderrig

1. Inleiding vir die Groep

Hierdie week staan ons stil by die Krag van die Woord. Ons besef weer dat God se Woord nie bloot ’n versameling tekste is nie, maar ’n lewende stem wat ons vorm en voed. Dit bring lewe, vertel ons van Christus, en dit anker ons in ’n wêreld vol verandering. Die Woord leer ons nie net wat om te glo nie, maar wys ons hoe om te leef. As dissipels word ons uitgenooi om dié Woord lief te hê, daarin te groei, dit te deel, en ander daarmee te onderrig. Wanneer ons ons lewens bou op die fondament van die Skrif, leef ons met vaste rigting en geestelike veerkrag.

2. Beginpunt

Wat beteken dit vir ons as ons hoor dat die Woord van God “lewend en kragtig” is? Deel ’n persoonlike ervaring of herinnering waar God se Woord vir jou rigting, troos of duidelikheid gebring het.

3. Bybelteks

Lees Matteus 7:24–28.

Wat sê hierdie beeld van die huis op die rots vir ons oor die rol van God se Woord in ons daaglikse lewe? Watter vers of frase tref jou die meeste in hierdie teksgedeelte?

4. Gespreksvrae

Let asseblief daarop dat ons nie elke vraag hieronder hoef te beantwoord nie. Die doel is nie om deur ’n lys vrae te werk nie, maar om as geloofsgemeenskap eerlik en opreg saam te gesels. Hierdie vrae dien slegs as ’n riglyn om die gesprek aan die gang te kry en ruimte te skep vir refleksie. As ons gesprek in ’n ander rigting beweeg, is dit ook reg so. Laat die Heilige Gees ons lei en vertrou dat Hy elkeen in die groep sal aanraak en aanmoedig om ’n pad van dissipelskap met Jesus te begin of te verdiep.

• In watter opsigte voed en vorm God se Woord ons in ons daaglikse lewe?

• Hoe kan ons leer om God se Woord nie net te bestudeer nie, maar ook toe te pas en daarin te leef?

• Hoe keer ons dat om die Woord van God te lees nie soos 'n taak voel wat ons sommer net moet afhandel nie?

• Wat keer ons soms om die Evangelie vrymoedig met ander te deel – en hoe kan ons hierdie week prakties begin?

• Watter rol speel ons in die geestelike groei van ander gelowiges rondom ons?

• Hoe kan ons as dissipels help om die suiwer Evangelie van Christus te bewaar in ’n wêreld van uiteenlopende boodskappe?

5. Gebedsfokus

Vra die groep om drie gebedspunte te identifiseer wat verband hou met hierdie week se tema. Dit kan byvoorbeeld wees vir ’n nuwe honger na die Woord, vir wysheid en geleenthede om die Evangelie te deel, of vir geestelike groei en verdieping in die lewe van die groep. Moedig die groep aan om ook vir mekaar se geestelike reis te bid, en om mekaar daagliks aan te moedig in geloof en gehoorsaamheid.

6. Afsluiting

God se Woord is nie ver nie. Dit is naby en lewend. Wanneer ons as dissipels kies om daarop te bou, sal ons geloof sterker wees as enige storm. Kom ons hunker na Sy waarheid, wees sensitief vir Sy stem, en gewillig om Sy Woord in dade om te sit.