Dag 1: Die Oproep van Dissipelskap

Oorsig

Jesus roep nie net mense om in Hom te glo nie, maar om Hom te volg. Hierdie roeping is nie passief nie. Dit vra ’n antwoord, ’n skuif van koers, en ’n lewenslange reis. Om ’n dissipel te wees, is om aktief deel te neem aan God se werk in die wêreld.

Bybelteks

Eendag toe Jesus langs die See van Galilea loop, sien Hy twee broers: Simon, wat ook Petrus genoem word, en sy broer Andreas. Hulle was besig om 'n werpnet in die see uit te gooi, want hulle was vissers van beroep. Hy sê toe vir hulle: “Kom hier! Kom saam met My, en Ek sal julle vissers van mense maak.” 

Hulle het dadelik die nette gelos en Hom gevolg. 

Toe Hy daarvandaan verder gaan, sien Hy twee ander broers: Jakobus 'n seun van Sebedeus, en sy broer Johannes. Hulle was in 'n skuit saam met hulle pa besig om hulle nette reg te maak. Jesus het hulle geroep, en hulle het dadelik die skuit en hulle pa verlaat en vir Jesus gevolg. . – Matteus 4:18–22 (AFR83)*

Konteks

Die see van Galilea was stil toe Jesus daar verby stap. Die son het pas begin opkom oor die water, en vissers was reeds besig om hul nette uit te spoel ná ’n nag van harde werk. Simon (later Petrus) en sy broer Andreas  was gewone mans. Hulle het nie in sinagoges gestudeer of onder rabbi’s gesit nie. Hulle het geleef van die vis wat hulle self moes vang, met growwe hande en eenvoud in hulle daaglikse bestaan.

En tog het Jesus juis na hulle toe gekom. Sonder vooraf waarskuwing of voorbereiding het Hy hulle aangespreek met net een sin: “Volg my! Kom saam met My, en Ek sal julle vissers van mense maak.” Daar was iets in Sy woorde wat hulle harte onmiddellik aangeraak het. Dit was ’n gesag, ’n liefde en ’n kragtige uitnodiging. Die Bybel vertel ons hulle het dadelik hul nette laat val en Hom gevolg. Geen vertragings, geen vrae en geen verskonings nie. Net gehoorsaamheid.

Die woord “volg” in Jesus se tyd het veel beteken. Dit het nie bloot beteken om agter iemand aan te loop nie. Die bedoeling was om alles te verlaat, en te word soos jou leermeester. Dit was om jou lewe in lyn te bring met die een wat jy volg. Jesus het hulle nie net genooi na ’n nuwe werk nie, maar na ’n nuwe lewe. Die vissers sou nie meer net hul dae spandeer om vis te vang nie. Hulle sou mense bereik, harte aanraak en draers van die evangelie wees.

Jesus se oproep aan hulle was ook ’n oproep tot vertroue. Hulle het nie geweet waarheen Hy hulle sou neem nie. Hulle het nie ’n plan gesien nie. Maar hulle het die Persoon gesien en dit was genoeg. Hierdie tipe vertroue sou hulle deur storms, vervolging, twyfel en selfs martelaarskap dra. Maar dit het alles begin met daardie eerste antwoord op ’n eenvoudige oproep: “Volg My.”

Hierdie oproep weerklink steeds vandag. Dit is nie beperk tot ’n tyd of plek nie. Jesus roep elkeen van ons, jonk en oud, geleerd en ongeletterd, seker en onseker, om Hom te volg. Om ons ou lewe agter te laat en in ’n nuwe verhouding met Hom te leef. Om deel te word van Sy missie op aarde om mense na God se hart toe te trek.

Kom ons dink saam bietjie verder oor die oproep van dissipelskap.

Die Oproep van Dissipelskap

Jesus roep ons om Hom te volg

“Kom hier! Kom saam met My, en Ek sal julle vissers van mense maak.” –  Matteus 4:19 (AFR83)*

Die Griekse woord wat hier as “maak” vertaal word is poiēsō. Dis ’n baie ryk woord. Dit beteken nie net om iets te skep of vervaardig nie, maar dra die idee van vorm, omskep, bewerk, tot stand bring en selfs om te ontwikkel tot iets nuuts. En hier lê die geheim. Jesus sê nie: “Volg My, en gaan vang mense.” nie. Hy sê wel: “Kom hier! Kom saam met My, en Ek sal julle vissers van mense maak.”

Die fokus is dus nie op wat ek en jy kan doen nie, maar op wat Jesus in en met ons kan doen. Dissipelskap begin nie met ons eie poging nie, maar wel met ons beskikbaarheid vir vorming. Dit is soos klei in die hand van ’n pottebakker. Die klei hoef nie self te weet hoe om ’n pot te word nie. Dit moet net sag genoeg wees om gevorm te word. Net so sê Jesus: Kom soos jy is. Ek doen die maakwerk.

Die woord poiēsō het ook ’n dieper betekenis in hierdie konteks, want hierdie woord hou verwantskap met verandering. Dit het te make met die verandering van die oue na die nuwe, letterlik om die oue iets nuuts te maak. Met ander woorde, hierdie woord dui op ‘n herskepping. Wanneer Jesus sê “Ek sal julle maak...”, maak Hy dit duidelik dat dit ‘n herskepping is tot iets wat jy nog nie is nie. Hy begin iets nuuts in jou. ’n Nuwe identiteit. ’n Nuwe missie. ’n Nuwe lewe.

Die oproep vra ’n onmiddellike en volledige reaksie

“Hulle het dadelik die nette gelos en Hom gevolg.” – Matteus 4:20 (AFR83)*

Die eerste dissipels het nie tyd geneem om alles te oorweeg of sekerheid te soek nie. Hulle het dadelik gereageer. Ware dissipelskap vereis nie volmaakte insig nie, maar volledige oorgawe. Die vinnige reaksie van Petrus en Andreas leer ons dat wanneer Jesus roep, ons nie moet uitstel nie. Elkeen van ons word uitgenooi om iets te los. Dit mag ons gemak, planne of selfs sekere drome wees wat ons keer om deel van iets groter te word.

Die oproep sluit ’n missie in

“Ek sal julle vissers van mense maak.” – Matteus 4:19 (AFR83)*

Jesus roep ons nie net tot persoonlike groei of redding nie, maar tot deelname aan Sy werk. Hy vorm ons, stuur ons, en gebruik ons om ander te bereik. Ons word nie geroep om toe te kyk nie, maar om deel te neem. As dissipels is ons nie passiewe volgelinge nie, maar aktiewe draers van die goeie nuus. Ons roeping is om ligdraers, vredemakers en hoopbringende mense te wees. Vissers van mense, gevul met Sy liefde.

Lees hierdie gebed hardop

Here Jesus,

U roep my met liefdevolle gesag.

U sê: “Volg My”, en my hart antwoord.

U is die Goeie Herder, die Weg, die Waarheid en die Lewe. 

Dankie dat U my roep,
nie op grond van wat ek kan bied nie,
maar op grond van U genade.

U sien meer in my as wat ek self kan raaksien.

Ek gee my lewe in U hande,
my drome, my vrese, my verlede en my toekoms.

Leer my wat dit beteken om U dissipel te wees,
om U woorde te gehoorsaam,

U liefde te leef,
en U roeping ernstig op te neem. 

Gebruik my, Here.

In U Naam bid ek dit.

Amen.