Embedded Files
Oorsig
Ware dissipelskap word bewys deur liefde. Dit is nie bloot gevoelens of woorde nie, maar dade. Jesus het liefde as die kenmerk van Sy volgelinge gestel. ’n Liefde wat opreg, sigbaar en diensbaar is. Ons liefde vir God word sigbaar in hoe ons ander hanteer.
Bybelteks
... en een van hulle, ’n wetgeleerde, het Hom met ’n vraag probeer vastrek. “Meneer,” vra hy, “wat is die grootste gebod in die wet?”
Jesus antwoord hom: “ ‘Jy moet die Here jou God liefhê met jou hele hart en met jou hele siel’ en met jou hele verstand. Dit is die grootste en die eerste gebod. En die tweede, wat hiermee gelyk staan, is: ‘Jy moet jou naaste liefhê soos jouself.’ In hierdie twee gebooie is die hele wet en die profete saamgevat.” – Matteus 22:35–40 (AFR83)*
Konteks
Die skare het weer rondom Jesus saamgedrom. Die Fariseërs, wetsgeleerdes en Sadduseërs het Hom probeer toets met ingewikkelde vrae oor die wet, die opstanding en die gebooie. In daardie tyd was daar groot debatte oor watter van die gebooie die belangrikste is. Sommige het op rituele gefokus, ander op die Sabbat, nog ander op morele wette. Maar toe Jesus gevra word watter gebod die grootste is, antwoord Hy nie net met een nie, maar met twee.
Hy sê: “Jy moet die Here jou God liefhê met jou hele hart, hele siel en hele verstand,” en dan voeg Hy onmiddellik by: “En jy moet jou naaste liefhê soos jouself.” Hierdie tweede gebod staan nie in afsondering nie. Dit is onafskeidbaar van die eerste een. Liefde vir God en liefde vir mense is twee kante van dieselfde muntstuk. Jy kan nie die een sonder die ander een hê nie. Goddelike liefde is nie net vertikaal nie, maar ook horisontaal.
Later, in die boek Johannes, gee Jesus vir Sy dissipels ’n nuwe gebod: “Julle moet mekaar liefhê soos Ek julle liefgehad het” (Johannes 13:34). Hierdie liefde is nie net ’n algemene gevoel van welwillendheid nie, maar dit is ’n liefde wat gewillig is om voete te was, laste te dra, en selfs die kruis te dra. Jesus stel nie net die standaard vir liefde nie; Hy is die standaard. Sy liefde is selfopofferend, genadig en aktief. Dis ’n praktiese, dienende, en liefdevolle lewenswyse wat deur Sy dissipels nagevolg word.
Toe Jakobus en Johannes Hom vra dat hulle die hoogste plekke in Sy koninkryk mag inneem, gebruik Jesus die geleentheid om te wys wat ware grootheid is. “Wie groot onder julle wil wees, moet julle dienaar wees,” sê Hy (Lukas 22:24-26). In God se koninkryk beteken liefde nie om gesien te word nie, maar om stil en nederig te dien.
Hierdie tipe liefde verander hoe ons leef. Dit maak dissipelskap sigbaar, nie in groot woorde nie, maar wél in klein dade. ’n Skouer om op te huil, ’n helpende hand, of ’n vergewende hart. So word liefde prakties uitgeleef en Christus word in ons midde vergestalt.
Kom ons dink bietjie verder saam oor liefde in aksie, om jou naaste lief te hê soos jouself.
Liefde in Aksie: Jou Naaste Liefhê Soos Jouself
Liefde vir ander Soos Jouself
“Jy moet jou naaste liefhê soos jouself.” – Matteus 22:39b (AFR83)*
Die woord “soos” (Grieks: hōs) beteken nie net dat twee goed met mekaar vergelyk word nie, maar sê ook hoeveel en hoe daardie “goed” gedoen moet word. Wanneer Jesus dus sê dat ons moet liefhê “soos” Hy liefhet, stel Hy nie net ’n voorbeeld nie, maar gee ook ’n maatstaf dat ons liefde van dieselfde aard en gehalte moet wees as Syne. Jesus sê nie bloot wees vriendelik met ander nie. Hy sê wees lief soos jy jouself liefhet. Dis ’n radikale maatstaf, want meeste mense is nog altyd gefokus op hul eie belange, omdat dit hulle oorlewing en geluk bepaal. Dit is heeltemal normaal om veiligheid, geluk, vrede en versorging na te jaag. Dit is presies daardie instink, om onsself te versorg en te beskerm, wat nou die model word vir hoe ons ander moet behandel.
Daar is egter ’n onderliggende gedagte wat in hierdie bevel ingesluit is, wat ons baie maklik kan mis. Jesus gebruik hier selfliefde as ’n gegewe, nie as iets wat eers ontwikkel moet word nie. Hy gaan van die veronderstelling uit dat mense van nature ’n ingeboude sin vir eie waarde en oorlewing het. Selfs die mens wat selfverwerping ervaar wil tog nog oorleef, vergewe word en betekenis hê. En juis daardie diep menslike dryfvere word nou die brug waardeur ons ander kan liefhê.
Daarom kan ons nie ons naaste werklik liefhê as ons nie ook leer om onsself te sien soos God ons sien nie. Elkeen van ons is kosbaar en spesiaal, geskape na die beeld van God (Genesis 1). Wanneer ons hierdie wete aangryp, word ons vry om onvoorwaardelik lief te kan hê. Net soos Jesus dit doen. Die gebod is dus nie net om ander lief te hê nie maar om dit te doen met dieselfde deernis en toewyding wat ons so natuurlik vir onsself sou hê.
Liefde bewys dissipelskap aan die wêreld
“Hieraan sal almal weet dat julle My dissipels is: as julle liefde onder mekaar het.” – Johannes 13:35 (AFR53)*
Jesus sê nie dat mense Sy dissipels sal herken aan hul kennis, hulle kerkbywoning of hulle standpunte nie. Nee, liefde is die spil waarom alles draai. Hierdie liefde gaan verder as vriendelikheid. Dit is ’n diep verbintenis aan ander se welstand. Wanneer ons mekaar met opoffering en getrouheid liefhet word die karakter van Christus sigbaar. Liefde is evangelisasie in aksie. Die wêreld sien Christus raak deur Sy liefde wat in ons gestalte kry.
Belangrikheid word gevind in diensbaarheid
“Wie belangrik onder julle wil wees, moet julle dienaar wees...” – Matteus 20:26–27 (AFR20)*
In God se koninkryk lyk krag anders. Belangrikheid word nie gemeet aan invloed nie, maar aan hoe bereid jy is om ander te dien. Jesus self, die Seun van God, het gekom nie om gedien te word nie maar om te dien. Wanneer ons kies om ander se voete te was, figuurlik en soms letterlik, leef ons Sy voorbeeld uit. Liefde word tasbaar wanneer dit op die knieë uitgeleef word in diens en opoffering.
Lees hierdie gebed hardop
Here Jesus,
U is die volmaakte voorbeeld van liefde in aksie.
U het gekom om te dien, nie om gedien te word nie.
U het my liefgehad selfs toe ek onwaardig was.
Ek loof U vir U nederige liefde,
U wat voete gewas het,
wat sonde vergewe,
en wat U lewe vir my gegee het.
Vul my hart met dieselfde liefde,
’n liefde wat nie vra “wat kry ek uit nie?”,
maar “wat kan ek gee?”
Leer my om ander net so lief te hê as myself.
Help my om nie net lief te hê in woorde nie,
maar ook in dade en waarheid.
In U Naam bid ek dit.
Amen.
Oordenking
Doen
Kies vandag om iemand onvoorwaardelik en prakties lief te hê. Stuur ’n bemoedigende boodskap, help met iets kleins, of vergewe iemand in stilte.
Dink aan iemand in jou lewe wat moeilik is om lief te hê. Begin bid vir daardie persoon, en praat met die Here oor hoe jy die verhouding moet benader.
Vers om te onthou
“As julle mekaar liefhet, sal almal weet dat julle dissipels van My is.” – Johannes 13:35 (AFR83)*
Vrae om oor te besin
Is daar iemand wat ek moet vergewe of opnuut met liefde moet benader?
Hoe kan ek prakties begin om liefde te leef en nie net te voel nie?
Kyk na die kort BibleProject video oor om God lief te hê met al jou "krag" (hieronder). Gee dit jou 'n nuwe begrip van wat dit beteken om God só lief te hê?
Google Sites
Report abuse