Dag 37: Fokus op die Toekoms

Konteks

Paulus het baie om op trots te wees, en net soveel om oor skaam te wees. In Filippense 3 lys hy sy indrukwekkende geestelike “CV”: fariseër, wetsgetrou, ywerig, onberispelik. Maar hy beskou dit alles as “verlies” in vergelyking met die waarde van om Christus te ken. Daarna sê hy iets kragtigs: hy is nog nie volmaak nie, maar hy gaan doelbewus voort, met sy oë gevestig op die hemelse roeping.

Vir Paulus was die verlede nie ’n anker wat hom vasgehou het nie. Nie sy suksesse of sy sondes het hom gebind nie. Hy kies eerder om hom uit te strek na wat voorlê, soos ’n atleet wat gefokus is op die wenstreep.

Ons leef vandag ook in so ’n wedloop. Dit verg dissipline van denke en hart om nie vas te kyk in die verlede nie, maar om vorentoe te beweeg. Dis maklik om vas te steek in foute, ou wonde of selfs nostalgie. Maar Christus roep ons altyd om te beweeg na meer van Hom, na groei en na hoop.

Dissipelskap is ’n pad van beweging. Ons is nie geroep om net te lees en besin nie, maar om aktief te volg. Om Christus te volg beteken om vorentoe te kyk, met verwagting, met volharding en met fokus op Hom wat voor ons uitgaan.

Kom ons dink verder saam oor hoe ons kan fokus op die toekoms.

Fokus op die Toekoms

Vergeet wat agter is – dit is nie jou finale storie nie

“Ek vergeet die dinge wat agter is…” – Filippense 3:14 (AFR53)*

Om te vergeet beteken nie om die verlede te ontken nie. Dit beteken om nie langer toe te laat dat dit jou definieer of rig nie. God het nuwe dinge vir jou. Jou verlede is deel van jou storie, maar dit is nie die laaste hoofstuk nie. Christus nooi jou om jouself los te maak en in geloof vorentoe te leef.

Wat besonder betekenisvol aan Filippense 3:13 is, is dat Paulus hierdie woorde skryf as iemand wat beide redes tot trots en tot skaamte in sy verlede gehad het. Hy was eens 'n vervolger van die kerk en later 'n apostel van genade. Tog sê hy: “Ek vergeet wat agter is,” nie omdat die verlede onbelangrik is nie, maar omdat dit nie sy koers bepaal nie.

Die woord "vergeet" hier dui nie op verlies van geheue nie, maar op ’n aktiewe besluit van fokus. Paulus kies om nie sy aandag op die verlede te hou nie. Hy vergelyk homself met ’n atleet wat nie agtertoe kyk terwyl hy hardloop nie, omdat dit sy pas sou ontwrig. Hierdie vers roep ons op tot 'n geestelike lewe wat voorwaarts gerig is: 'n lewe waarin die verlede aan God oorgegee word, en waarin elke dag 'n nuwe kans is om in die lig van sy roeping te leef.

Strek jou uit na wat voor is – geestelike groei verg doelbewuste beweging

“Ek strek my uit na wat voor is…” – Filippense 3:14 (AFR53)*

Dissipelskap vra volgehoue strewe. Groei in geloof gebeur nie toevallig nie. Dit vra dat ons onsself uitstrek en toewy aan die dinge van God. Wanneer ons bid, die Woord bestudeer, vergewe en vertrou, beweeg ons vorentoe. Selfs klein treë van gehoorsaamheid word groot wanneer Christus die rigting bepaal.

Soos wat ons die einde van die 40 dae van Dissipelskap nader, moet ons besef dat hierdie laaste 40 dae ’n inleiding tot Dissipelskap was. Ons het maar ’n voorsmakie gekry van wat dit beteken om werklik ’n dissipel van Christus te wees, en ons het ook besef dat dit nie noodwendig ’n maklike pad is nie. Dissipelskap begin met dit wat God in ons doen, en dan moet dit uiteindelik oorgaan in ’n lewenshouding waar mense kan sien dat ons “anders” is. Hierdie “andersheid” is dikwels baie aantreklik, en so kan ons ’n stille getuie van ons geloof vir mense rondom ons word. Maar dit gaan alles gepaard met beweging: beweging van jong Christen tot ware dissipel.

Fokus op die doel – die hemelse roeping in Christus

“...en jaag na die doel…” – Filippense 3:14 (AFR53)*

Daar is 'n doel om na te jaag: die prys van God se hemelse roeping in Christus Jesus. Hierdie lewe is nie die eindbestemming nie, maar dit is van groot belang. Ons beweeg na ’n ewige erfenis. Fokus gee rigting, en rigting skep momentum. Wanneer ons oë gevestig bly op Jesus, word ons nie maklik afgetrek deur die dinge van hierdie wêreld nie.

Lees hierdie gebed hardop

Hemelse Vader,

U is die God van my verlede, hede, en toekoms.

Dankie dat ek nie gedefinieer word deur my verlede nie.

Ek bely dat ek soms vashaak in skuld en ou wonde.

U roep my egter om vorentoe te beweeg.

Ek kies om my uit te strek na wat voorlê.

Gee my 'n visie vir U roeping op my lewe.

Help my om volhardend aan te hou beweeg.

Verander my denke waar dit vasgevang is.

Herstel my hoop waar dit verflou het.

Vul my hart met verwagting
en my voete met momentum.

Amen.

Oordenking

Doen

• Skryf drie dinge neer wat jy graag agter jou wil los en vertrou dit aan God toe.

• Skryf drie dinge neer waarvoor jy jouself graag geestelik wil uitstrek en begin vandag daaraan werk.

• Sit vandag vir 5 minute stil en dink oor hoe God met jou in hierdie laaste paar weke gepraat het. Wat is die eerste stap om volgende op jou nuwe dissipelskapslewe te neem?

Vers om te onthou

“...ek vergeet die dinge wat agter is en strek my uit na wat voor is...” – Filippense 3:14(AFR53)*

Vrae om oor te besin

• Wat hou my terug om voluit vorentoe te leef?

• Wat kan ek doen om meer doelgerig te fokus op my geestelike groei en roeping?